Recent Posts

كاتب كلام حتى نهايتى ،، ضلى مسجون وعقلى حر ،، فى حياتى حاجات كتير ،، دوقتنى عسل ومر ،، ملقتش ترياق غير كتابتى

الصخرة وكرة القدم

الصخرة وائل جمعة

اللاعب اللى بصراحة مش هلاقى وصف ليه ،، هو صخرة فعلا فى كل جوانب حياته

اللاعب اللى عمره ما تمارض أو عمل مشاكل فى فريق الاهلى أو منتخب مصر

نادراً ما تلاقى لاعب راجل وعصبه شديد فى الملعب زى وائل جمعة

وطبعاً عشان احنا بلد هزوء ،، والراجل بردوا حب يحترم نفسه وتاريخة

قالك اعتزل دلوقتى بدل ما تحصل مشاكل فى المستقبل ويبقى شكلى وحش

*****************************************************

** عمرى ما لعبت كورة فى حياتى الا نادراً مع انه كان نفسى ألعب كورة زى اى حد**

رحلتى مع كرة القدم بدأت سنة 1994 فى كاس العالم اللى كانت الولايات المتحدة الامريكية بتنظمة فى الوقت ده

وبصراحة كنت طفل ومفهمش حاجة فى الكورة خالص ،، ولكنى كنت متفاعل يعنى

ومع آى كورة تطلع بره الملعب أنا بعتبرها جووووووووووول !!

والبطولة دى أنا مشفتش فيها غير ماتشين أو تلاتة ،، بس باقى الماتشات كنت متابع فيها اسماء اللاعبين

روبرتو كارلوس ، ديفيد سوكر ، زوبى زاريتا ، باتستوتا ، ريفالدو ، بيتر إشمايكل ، ببيتو ، (زامورانو و سلس) ... إلخ

وبعدها دخلت على كاس العالم 1998 إللى كان فى فرنسا ،، والحقيقة البطولة دى هى اللى حببتنى فى كرة القدم 

 وبعد عشرة سنين من البطولة صنفها الخبراء على انها كانت أمتع بطولة فنية لكرة القدم حتى الان !!

 بطولة دورى أبطال أوروبا بردوا أنا بشوفها من زمان ولغاية دلوقتى وبنظرلها فى الماضى على انها أمهر بطولة فى العالم ،، ولكن مع الكورة الحديثة أنا بشوف حالياً أنها أقوى بطولة كورة بتتلعب على مستوى الكرة الارضية .

بالمناسبة كاس العالم كان بيتذاع على القناة التانية للتليفزيون المصرى والبطولات المهمة كلها ،، ومين ينسى دورى أبطال أوروبا لما كان بيتذاع هو كمان !!

وأنا أذكر بكل مرارة السنة اللى احتكرت فيها الـ ART - الجزيرة الرياضية سابقاً - beIN Sport حالياً بطولات الفيفا كلها والتليفزيون المصرى وقف بشكل مخزى جدآ ومدخلش فى المعمعة ساعتها ،، ولغاية دلوقتى احنا برة المعمعة بمراحل ولا يمكن ندخل تانى خلاص !!

أيام بقى (الواحد شكلة عجز ولا الزمن هو اللى اتقلب قلبه زفت)

أنا اهلاوى مدريدى منشستراوى ميلانى بفارى ،،  بس عمرى ما كنت متعصب للكورة ابداً ،، مش مهم عندى لو فرقتى اتغلبت ،، ومش بلاقى حجج فارغة أبرر بيها الهزيمة الا لو كانت أسباب ظاهرة فعلآ .

وأذكر انى أيام ما كنت مراهق وكنت فى المرحلة الثانوية ،، كان عشقى انى أجيب جريدة الاهلى اللى بتصدر مساء كل خميس من كل أسبوع

ومكنتش أروح البيت الا لما أجيبها وميهداليش بال الا لما أجمع أعددها كلها ،، ويا سلام بقى لما يبقى الاهلى بيلعب مع الزمالك ويصدر عدد خاص من الجريدة

ومهما غلوا فى تمنها كنت غاوى اوى اجيبها وأقراها وبعدين أحتفظ  بيها --- بس خلاص بقى كل ده إنتهى مع الايام والعادات اتغيرت تماماً !!



إلى لقاء قادم
إرسال تعليق