Recent Posts

كاتب كلام حتى نهايتى ،، ضلى مسجون وعقلى حر ،، فى حياتى حاجات كتير ،، دوقتنى عسل ومر ،، ملقتش ترياق غير كتابتى

ذكريات جامعية - الجزء الثانى


بدأت مأساتى مع كلية الاداب ساعة التقديم للاقسام (التنسيق الداخلى)

والحقيقة أنا كنت مقبول لآقسام كتيرة فى الكلية ماعدا تلات أقسام

وكان إختيارى الاول هو قسم اللغة العبرية ،، وطبعاً ساعتها سمعت من داخل القسم ان الناس كلها بتسقط فى سنة أولى ومش بيكون ليها مستقبل وانهم بياخدوا دروس مع الدكاترة .......... إلخ

فبدأت أحول وجهتى لقسم الحضارة الاوروبية ،، وفعلآ حولت للقسم ده بعد زن من عيلتى 

فى أول محاضرة لقيت عدد 700 طالب على ما اتذكر (الانتساب والانتظام مع بعض) حاضرين المحاضرة فى مدرج مش بيساع الا 300 طالب !!

طبعاً قعدت على الارض والدكتور حسسنى أنا واللى قاعدين جنبى اننا يا عينى لاقيين مكان فى المدرج ومش عايزين نقعد فيه وحابيين قاعدة الارض !!

المهم الدكتور دخل المدرج وقفل الباب وولع سيجارة والحقيقة مش متذكر اسم الدكتور ايه ،، ولكن السجاير كانت مارلبورو !!

الدكتور زعق بعلو صوته "كعادتهم يعنى" : مش عاااااااااااااااايز صوت الجو حر وأنا مش طايق نفسى ... على أساس اننا مش بنى آدم وبنتنفس زيه بالظبط

وطبعاً لكم أن تتخيلوا 700 طالب بيتنفسوا اساساً ،، والغريب انه مش عايز يسمع صوت !!

عرفنا بنفسه وقالنا انه دكتور يونانى حديث وقعد يكلمنا عن مميزات اللغة نفسها وعبقريته فى تدريسها ،، كان مبالغ فيه بصراحة !!

المهم وهو بيتكلم لقى طالب بيتكلم مع بنت جنبه (اظاهر كان بيقولها شيلى الشنطة عشان اعرف اقعد) فالدكتور قفشه وقاله اطلع برة انت وحبيبة القلب اللى جنبك ،، وبعدين زعقلنا احنا كدفعة وقالنا : أنا مبحبش حد يتكلم فى محاضرتى ،، أنا عصبى ولسانى قليل الادب ،، وآى خول هيتكلم بعد كده هقطعله الكارنية بتاعه !!

وبعدين مشى بعد ما قعد ربع ساعة كانت من جحيم (حر وزحمة وقلة ذوق )

خرجت بعدها من المحاضرة وقررت أروح وأهرب من الجو الزفت ده ،، حتى كان عندى محاضرة بعدها ولكن محبتش حتى اعرف هى فين وبالفعل روحت وانا فى قرارة نفسى انى هحول وجهتى لقسم يكون أفضل من الاتنين اللى فاتوا !!

بعدها بيومين دخلت الكلية وحولت وجهتى على شباك شئون الطلبة اللى قعدت قدامه شهر ونص بالتمام والكمال ،، رايح جاى علشان احول من القسم اللى انا فيه !!

بعد محاولات مريرة وانتقالى من قسم لقسم (حولت كمان فى النص لقسم جغرافيا .. ودراما ونقد مسرحى

المهم اصطدمت فى الاخر بإتنين معيدين كانوا قاعدين فى قسم جغرافيا أحدهم بقى دكتور دلوقتى ،، وبعدها قررت انى ادخل قسم المكتبات والمعلومات بعد ما اتشديت للأسم اوى (مكتباااااااااااااااااااااااااات ومعلوماااااااااااااااااااااااااات)

وبدأت رحلتى مع القسم فى منتصف شهر أكتوبر سنة 2007 ،، وكانت اول محاضرة ليا


إنتظروا الجزء التالت

يـٌتبع

إرسال تعليق