Recent Posts

كاتب كلام حتى نهايتى ،، ضلى مسجون وعقلى حر ،، فى حياتى حاجات كتير ،، دوقتنى عسل ومر ،، ملقتش ترياق غير كتابتى

ذكريات جامعية - الجزء الاول


أنا كنت فى دفعة قسم المكتبات والمعلومات إللى دخلت الكلية سنة  2007

اسطورة الدفعة  بتقول ان بعد التخرج  معظم بنات الدفعة اتجوزوا + ولد وحيد والتانى جاى فى السكة ،،وأغلبية اللى اتجوزوا دلوقتى معاهم أطفال

كانت آخر دفعة المحترمين فى قسم المكتبات والمعلومات جامعة عين شمس

الغريب فى الموضوع ان كل ولد أو بنت فى الدفعة كانوا شايفينى بمنظور و وجهة نظر مختلفة عن التانى

مع انى بنى آدم واحد مش بتغير لا فى تصرفاتى ولا أفعالى

أنا لسه زى ما أنا .. يعنى متغيرتش ومبقتش حد تانى .. بس بقيت مدردح حبتين !!

كعادتى أيام زمان بعد ما كنت خارج من مرحلة مراهقة عنيفة ، انى أكون مكسوف من آى مجموعة أصحاب جديدة بتعامل معاهم 

بس مع الوقت تأقلمت سريعاً مع دفعتى ،، لدرجة ان فى ناس بدأت أعرفها وأسلم عليها لما كنا  فى سنة رابعة !!

لذلك بعتبر فترة الجامعة هى أحسن فترات حياتى (بكذب طبعاً)

ولكن العيب مش فى الناس ،، العيب نوعاً ما كان عليا ،، لانى كنت بتكسف جدآ ساعتها

وده إللى وضعنى فى صندوق مع مجموعة (أخشى الله أن أقابلهم فى جهنم)

ولآنى ناجح فى شغلى فى مجال المعلومات على الانترنت قبل ما ادخل كلية الاداب ،، كان طبيعى انى الاقى الفشل مستنينى فى دراستى الجامعية وفاتحلى درعاته

(الظلم والغش والفشل والتكاسل والخوف والاهمال) كل دى عوامل خلتنى أستمر فى الكلية بعد الاربع سنين الطبيعيين

مكنتش مدرك ساعاتها آى عامل من العوامل دى غير انى كنت مهمل اوى ..أهمال نفسى وأهمال صحى !!

الاهمال النفسى ناتج من التخبط فى القرارات والصمت الكتير اللى كنت ببقى فيه

والاهمال الصحى ناتج عن ترك الرياضة اللى كنت بلعبها ،، وانى مكنتش بفطر الصبح خالص

وتقريباً مكنتش بآكل بشكل منتظم طوال تلات سنين ،، وبشرب شاى كتير على الريق الصبح

وده كان بينفر ناس كتير منى لآن ريحة نفسى كانت وحشة ،، بجانب ان كان عندى ضرس منغص عليا حياتى ساعتها

والسطر اللى فوق ده  كان بيخلينى بنسبة قليلة انى اسكت علشان مشوفش نظرة الاشمئزاز فى عيون الناس اللى بكلمها



إنتظروا الجزء التانى

يـٌتبع

إرسال تعليق