Recent Posts

كاتب كلام حتى نهايتى ،، ضلى مسجون وعقلى حر ،، فى حياتى حاجات كتير ،، دوقتنى عسل ومر ،، ملقتش ترياق غير كتابتى

معنى حب



عرفنى ايه معنى .. حب ؟؟

حب يعنى .. يعنى قرب

يعنى عشق

اهتمام .. وفيه مودة

يعنى قلبى مش بيهدى

الا لما اشوف عينيكى

يعنى عمرى كله ليكى

وبردوا ضيفى من اللى عدى

يعنى طبطبة الايدين

واشتياقها مع الحنين

واما قلبى يوم يلين

بيكى استقوى وارضى

عرفتى ايه معنى حب !!

لو عالحب ...



لو عالحب .. حبينا

وعشنا سنين مع التنهيد

توهنا كتير فى ليالينا

وفرح القلب لسه بعيد

جريء بالعشق من يومى

وقلبى نشف كآنه حديد

كبير حبك على همومى

لكن همى تملى يزيد

ليه بتبعدى عنى !!

امتى نقرب المواعيد ..؟

يفيد بـ ايه ؟



مش مسألة بينا خلاف

ولا مسألة مين إللى خاف

المسألة قلب وحياة

وأنا معاكى مبقولش آه


على حياتى مفيش إكراه

ولا عندى صك أبيعهولك

الحب لو عينك نكراه

هيفيد ب إيه أوصفهولك !!

ولا ايه ؟!!




ضمنى وأنا ميت

ضمه لا يمكن تتنسى

يمكن ضلوعى المتيبسة تلين

يمكن القلب اللى ياما قسى

ينبض ويحيي فيا الحنين

يمكن تصحى حاجات كتير

ماتت من قبل موتى الاخير

مانا ياما عذرتك

لما دموعك نزلت وانا حى !!

دلوقتى دموعك جفت ليه

يمكن وانا ميت احسن

ولا ايه ؟!!

مبدأ




أكره فـ الارتباط الغش

وأحب وقته ميطولش

وأعشق نفسى وأتمنى

تشوفينى بنفس الوش


لا بخدع قلب ولا بجرح

صريح جدآ و من يومى

لا هستناكى وأتالم

ولا هشيلك كما همومى


راضية بيا !! إتعايقى

وقولى هو ده حبيبى

لو انتى بجد عيزانى

حبينى على عيبي

سعادة



مخطوط لـ قلبى إتخط

هز البحور والشط

طلعت انى بحب

والعشق منى نط


راح أستناك هناك

أملى فى انى القاك

بسمة شفايفى فرحت

عرفت حكايتى معاك


 الوردة لونها مفتح

جاية لعيونك تفرح

سيبك بقى من حكايتى

ده الحزن ملهوش مطرح


القصة الاولى



بالقصة الاولى فى وجدانك

بلمع فى الضلمة

وبقفل فى النور

أنا اصلآ مكروه

وتعدى عليا

تلاقينى قاعد عالقهوه


فى الزحمة

راح أخبط كتفك

فـ تاخدى معاكى

ريحة الخمر

وعيونك مليانة دموع !!


لما تعدى

هتلاقى واحدة جميلة بتحضنى

هتلاقى الليل عمال يسكننى

ورا شبابيك الجيران


تحت الجسر مفيش مطر

تحت الارض بأرض كمان

ناس متغربة


هتعدى على طرف لسانى

عشان تحسى مرار الحلق


بالفكرة الضايعة فـ بالك

كوابيسك ويا أحلامك

فاترينة فى مطعم بتحاسب

كل زباينها قدامك

تستنى تاخدى تاكسى

علشان الحر

بين أنفاسك


فى ملاهى وشوارع

فى القبر آنين الـٌرضع

معاها وردة عشاق

فى القبر قاعد مستنيكى

بنفس الذكرى ومشتاق !!




عيد


فاصل بين الجمل

وجمله بين الفواصل

لآ عرفنا إللى حصل

أو ايه كان بيننا حاصل

حاله رقيقه من الحنين

صحبه كلنا متجمعين

فى ليلة العيد ...

كل الشوارع بتغزل حب

وأنا وصاحبى مش ندمانين

صرفنا كل فلوسنا

وجبنا اللبس ودوسنا

ف الفرحة وف المصاريف

كل سنه وإحنا

والناس والدنيا وإنتوا

ديماً طيبين


أول مرة




زى أول مرة حب

زى أول مرة حضن

زى احساس قلبى بإيديكى

زى ما أتعب يوم وأجيكى

زى أول يوم ما بيننا

زى فرحى بشوق ساكننا

زى كل يوم بفكر

قد ايه بحبك أكتر

مجرد فقد !!


عارف احساس انك تتكلم مع حد لمدة قصيرة من الايام وتلاقى نفسك متعلق بيه

وبعدين هو لآسباب خاصة انت متعرفهاش تلاقيه مش بيكلمك فجآة كده

لان طبعه هو الكتمان ،، وإنت إتعودت كده منه
 
" فـ مهما حاولت تسأل وتعرف ايه هى الاسباب دى اللى خلته يبعد بردوا مش هتلاقى رد "

وانت بتهاتى مع نفسك وتسيب تصوراتك وخيالك وفكرك يودى ويجيب !!

صدقنى بتبقى عايز تقوله من كل قلبك :

إنت واحشنى اوى .. نفسك أشوفك والمسك ...

احساس صعب بجد لما تلاقيه مش بيسئل عليك زى الاول

مش بيكتبلك حرف .. أو حتى يسمعك صوته !!

الشخص ده هو اكتر انسان بيعذبك فى الدنيا

وهو نفس الشخص اللى انت بتحبه فى الدنيا اكبر حب

الانسان ده فارق معاك اوى مهما حاولت انك تنكر ده

هو ده الانسان اللى انت بنيت عليه احلامك وأمالك كلها

هو اللى هيخليك مبسوط قد ما انت هتسعده

وحاسس ان الدنيا هتبقى احلى بكتير معاه

حتى لما تتعب هتبقى عارف انه الوحيد اللى هيبقى جنبك

لكنه دلوقتى مش جنبك ،، وإنت مدرك وعارف كده كويس

وهو ده احساس الفقد !!

تــنــصــل !!



لا أنا شاعر ولا فنان

وبتلخبط وبتنطط وبستعبط

وعايش حالة مـ التوهان


مانيش عالحب مستعجب

ولا قلقان ولا بدبدب

ومش مرسوم لخطاويكى ومتركب


ساعات كتير بتحير من جسمى

كفوفى النعمة مشقوقه .. فـ بتشخبط

على ورقة يقولوا عليها من رسمى


ده حتى الحزن بيعانى

ونفسه بفرحة .. تبتسمى

فـ متحير ما بين اسمك يا حبيبتى وبين اسمى


علمتينى




علمتينى ازاى أسهر

ونستينى الممسى

يا بحر ضايع فيه

الـشـط والـمـرسـى

علمتينى ازاى أحب

علمتينى ازاى أنسى

علمتينى ازاى أحن

علمتينى ازاى أقسى


تبلد



فرق وجودك من العدم

هو النفس

والرذاذ إللى خارج من جوا حلقك

طعمة مر !!

صبرك على الجمود فى الدم

مصلبش عروقك

لوحدك .. حقيقة ثابتة

والفراغ .. الوهم !!

مجرد نقط جوا الفراغ

ساعة اللقا مش بتعرفها

نفس إللى كان وإللى فات

نفس السواد .. غمى العينين

فين راح .. رسم الطريق

---------------------

نقط ... سراب !!

إشتياق



ما بين الوقت والتانى

خطاويكى وحشانى

ولما بتبعدنى عنى

قلبى يدق فى ثوانى

ويمنعنى عن التنهيد

فـ بفتكرك وحيرتى تزيد

هتجينى بقى امتى ؟؟

وامتى نرجع المواعيد

يا ملكانى ووحشانى

يا عايشة بروحى وكيانى

كل ما فيكى جوايا

وكل ما فيا بيعانى


دنيا !!



أنا قلبى حاسس بالحياة وبطعمها

لا فـ يوم حبتنى أنا

ولا عمرى يوم حنيت لها

هو كده بقى طبعها

تقسى ساعات .. وساعات تلين

من غير ما حد يقولها


نفسى




نفسى آدى لروحى قرض

آى حد يجيبلى ورد

انى أحب كمان بجد

وابقى فرحان بالحياة

وأنتشى ومقالوش آه

وهى بتقدملى عرض


رجاء



ضلك أنا وعشرتك

نورك أنا وجنتك

حبك حقيقى وبسمتك

متغبش عنى حبيبى بنظرتك

واما تواعدنى بالكلام

مخلفش يوم أنا كلمتك

بتعب اوى وانت بعيد

خليك حنين فــ قسوتك


الحب راحة



الحب راحة

وفية فروق

كلمة صراحة

وإحراج بذوق

الطبع غالب

لما تحب

تفرح بقلبك

ورجليك تدب

ده الحب راحة

بس نحب !!


مفيش حاجة تستاهل



صدقنى مفيش حاجه تستاهل

الجرح اهوه علم بالساهل

وانت بتتعلم بصعوبة


الدنيا دى قاسيه وحكايتها

مهما هتطول فكرتها

ف الآخر بتكون مقلوبة


ده محدش طبطب على وجعى

وأنا ياما ندمت وبخبى

على نفسى دموعى المغلوبة


خاطره -3 : وضع قائم





الحقيقة إنى يئست ،، وتعبت من كل حاجة

ومش بحب أقول كده للناس اللى حواليا علشان ميضايقوش هما كمان !!

كل واحد فيه اللى مكفيه وزياده

لكن الالآم والمراره بقت أزيد

سيبك من إن كل حاجة وحشه ومفيش بديل غير انك تكون وحش

بس حتى الوحش بتعمله وانت مش مستمتع أو مش راضى أو نفسك مكسوره

حاجه تحير فعلآ ..امتى أنا هخف من التعب طيب !! ؟؟

السؤال ده إجابته فى الحياة التانيه إللى بعد الدنيا أو فى الآخره بمعنى أدق

الاهم دلوقتى انى ادور زيي زى غيرى على حاجه اعملها اشغل بيها كم الفراغ المليان ضيق ونفس "حار"وحاجات فى الصدور والله ما بتتوصف بالكلام

فى فجوة ملهاش علاج الا عند ربنا سبحانه وتعالى ،، وإطمنوا ؛ علاجها بيجيي لوحده بدون آى مؤثر !!

الآمل مش كلام بيتكتب ويتقرىء علشان يولد دافع ،، بالعكس بقى ده الدافع هو إللى بيولد الامل

يعنى الكلام ملوش لزوم ،، يبقى ليه نوهم نفسنا بيه على انه حافز !!

الحافز ده بيخلينا نستمر فى السكة الغلط ،، ولما ندرك اننا غلط

آه والله بنرجع ناخد حافز تانى وندخل سكة غلط تانى

التجارب السيئه لآ هى بتعلمك ولآ إنت بتتعلم منها غير السوء ،، لآنها جايه من اسمها "سيئه"

وبلاش تسمع كلام الناس إللى بتقولك :

على الاقل انت دخلت التجربة وشفت وأكيد المره الجايه مش هتقع فى نفس الخطأ لآنك إتعلمت !!

تقريباً الناس دى مقرتش السطرين اللى فوق !!

وأوحش حاجة بعملها دلوقتى وهو انى بكتب وأنا حيران وآلف حاجة بتشوش على تركيزى ودماغى هتنفجر من النظر للمستقبل


لـــــلآســـــف مـــــفـــــيـــــش حـــــل !!

ذكريات طفولتى (الجزء الآول) - البداية



ديماً فـ دماغنا صور مشوشه ،، وأحاسيس عمرها ما بتتكرر من كتر حلآوتها

إنها ذكريات الطفولة !!

ولكن معايا أنا الموضوع مختلف ،، لآ كان فى حلاوه ولا بقلاوه ولا يحزنون

أنا مش فاكر من مرحلة الطفولة (المرحلة المدرسيه أقصد) الا كل آلم وعذاب وقهر

كنت حاسس بالقهر ده من لما كان عندى 8 سنين ،، آه والله

وكنت عارف ان القهر ده هينعكس عليا فى المستقبل ،، آه والله

وكنت عارف ان القهر ده هيخلينى أنشط ذكائى علشان اتلافى حدوث آى ضرر ليا من نفس الفعل بعد كده


مش هطول كتير فى الكلام ولكن أوعدكم بسرد كل ذكريات طفولتى فى السطور دى والسطور الجايه

ولو حصلك حاجة من الحاجات اللى هكتبها إن شاء الله ،، ممكن تسيب تعليقك أسفل التدوينه

-----------------------------------------------------------------------------------------------------------------

ذكرياتى فى الحضانة

أول يوم نزلت فيه من البيت فى حياتى ،، رحت قعدت عالقهوه من خالى (رحمة الله عليه) والكلام ده على ما أتذكر كان فى منتصف التسعينات ،، وشربت ساعتها عنااااااااااااااااب مسكر جدآ وحبست بعدها بكيس الشيبسى ابو نص جنيه ^__^

وبعد ما رجعت على بيت جدتى (رحمة الله عليها) وكنت سكران طينه من إللى شربته وآكلته ،، بصراحة عملتها على روحى لما نمت ،، وجدتى تانى يوم قالت لماما الولد كبر ولازم يروح الحضانة ،، أمى بقى مكدبتش خبر وسحبتنى تانى يوم زى الفرخه الساعه 6 الصبح علشان تصورنى ،، وكان ساعتها الجو تلج لآننا كنا فى عز الشتا ،، وتخيلوا مدى العذاب لما طفل يصحى فى التوقيت ده وبعدين ينزل فى البرد !!

مش هى دى البوينت بقى !!

البوينت فى أن شعرى مش ناعم ،، أبسلوتلى ،، أنا كان شعرى بيتسرح بواسطه من مديرية الامن شخصياً ،، وكنت بصرخ جدآ وبكرهه تسريح الشعر من الاصل + الجزمة الهولآميه اللى لونها بنى !!

هى اسمها جزمة لآنها كده فعلآ *___* ومن هنا بتيجى صعوبة الخروج من البيت مع أول يوم ليا فى الحياة اللى بره



يـــــٌتـــــبـــــع إن شـــــاء الله


روحى




بعت روحى لروح روحى تجيب روحى

لآ جتنى روحى ولآ إللى بعتله روحى

يا نسمة الفجر هلى وإرجعى وروحى

وســلــمــيــلــى على اللى عندهم روحى

لآ جتنى روحى ولآ إللى بعتله روحى

فراق الحبايب أصعب من طلوع روحى


 

مش مهم





إزعل

لو زعلت وحدك

إصرخ

العن لو نفسك

اقطع نفسك !!

محدش مهتم

خليك كئيب لو عايز

أحزن وامشى فـ جنايز

أنت ملكش لازمة

شيل الهم !!


ندى



يا ندى العمر فـ سمائى

يا عبيرى وإشتياقى

مهما همس الناس وجعنا

الحنين هو إللى باقى

************-************

يا ندى العمر الحقيقى

نوريلى كمان طريقى

افتحيلى نهر جارى

قطرة منه تبل ريقى

************-************

يا ندى قلبى المسكر

شوقى ليكى تملى يكبر

واما اثبت يوم فى حبك

كل يوم بحبك اكتر




إنسان غريب









مكنش بيطيق من الكلام غير كلمتين

حب وحبيب !!

وبنظره واحده من نظرتين

قلبه يغيب !!

ولآ كان بيتوه فى المعانى

لكنه شاعر !!

سره فى عقله ديماً معاه

وهو كان إنسان غريب !!


خاطره -2 : إحساس



نفس البداية كل مرة بتتكرر

نسيان .. ووهم انهم صالحونا

مع اننا احنا اللى بنتصالح مع نفسنا ونعديها

ونرجع نكلمهم كآن مفيش حاجة حصلت من الاصل


منتهى السخافة انك تتهاون فى حق نفسك

حتى لو مع أقرب الناس ليك

مش معنى انه قريب منك انه يجيي عليك

ويغلط .. ويغلط .. ويغلط


الغلط محسوب تماماً ،، ولكن العقل ساعات بينسى

اصل العقل ده طيب اوى

مش عايز يشيل صاحبه الهم


ديماً الحيرة مش هنا

الحيرة فى المساحة الكبيرة

اللى انت سايبها بكامل إرادتك "الضعيفة" للى هب ودب

انه يلعب بمشاعرك وكرامتك


لذلك أنا أخدت قرار مهم جدآ :


"ملعون فى الارض اللى يزعلنى"

----------------------------------------------------------

ملعونة الكلمة اللى تجيبك ولآ توديك

ملعونة الآرض اللى تشيلك وتشيل خطاويك

لو كنت ابن حلآل صدقنى ،، كان يتمر فيك

خاطره -1 : نصيحه



نفس الحاجات والمحتجات إللى كانت بتزعلك مستمره

متقولش العيب فيك

الانسان اصلآ ناقص فى تكوينه

ولكن العيب فى الناس اللى عندها نواقص زايده عن الحد المعقول

وبيحاولوا يكملوا نواقصهم من خلالك

ف نفس الوقت مش كل اللى بيقولك أنا بحبك بيحبك فعلآ

جايز عنده ضروره فى لحظه معينه انه يحس ويقول كده !!

وبعد فتره ،، أفضلك تبعد وتقطع علاقتك بالشخص أو بالاشخاص دول

بس تنقح عليك اوى فكرة انك تفضفض لحد

أقولك حاجه جميله ...

مترجعش للناس دى تانى أو حتى تختار أفضلهم عشان تفتفض معاه

لآن اصلآ مفيش حد فيهم "فاضل" ..
 
 

إتنين × خصام



قولتلها وحشتينى

قامت قالتلى : على عينى

وميضرش يا نور عينى

تغيب عن بالى وتسيبنى

وبتقولى وحشتينى !!



I miss you!



قالتله امتى هتجينى

رد : زهقت وسنينى

بجد الرحمة تعبتينى

بترمينى وما تهتمى

وبعد ما آجى تنسينى !!
Enhanced by Zemanta

بين الحروف



أهيم فى شعرك المطلوق

مجيش تانى

أنا جنبك فـ بنسانى

يا وحشانى وهجرانى

وعايشه فـ روحى وكيانى

قوليلى إزاى .. أرد بـ ايه

وكل كلمة فى قصايدى

كتباها وكتبانى

أقولك فكرة لو ينفع

وأنا العاشقك يا عشقانى

ما تيجى نفرح ..  والدنيا

نسيبها لوحدها تعانى


عيد العمال


عامل .. وفلآح .. ومقهور تعرفنى من دينى

أنا إللى شغال فى البلد دى وطالع حباب عينى

يحيا عمال مصر

الظروف بتقتل ساعات



قلبى حاسس انك بتكرهينى

انتى قولتى بتكرهينى تانى

أنا بعتذرلك عاللى ضاع

آسف اوى على الامانى

***---***---***

مش أنا الواد الهمام

إللى كان هيزيح جروحك

إتركينى ... والسلام

روحى دى مبقتش روحك

***---***---***

جمله من حبة كلمات

الحنين فى القلب يقتل

والظروف تعمل حاجات

بتخلى المربوط بيفصل

سؤال محيرنى




يا بخت إللى عنده من الصحاب اتنين

وواحدة بتحبه شايله بدل قلبها .. قلبين

وعقل راسى بينسى حمول السنين

لكن بيتبقى سؤال محيرنى :

معمول من ايه يا طين ؟؟